نجدّد للمعنّى ألفْباؤو/ الشاعر لطيف مخائيل


بهذه القصيدة الرائعة ودّع صهرنا.. صهر بلدة مجدليا الغالية، الشاعر لطيف مخائيل نقيب شعراء الزجل في لبنان الشاعر جورج أبو انطون والشاعرين انطوان سعادة والياس خليل، الذين زيّنوا الغربة بدعوة من رئيسة جمعية إنماء الشعر العربي المحامية بهية أبو حمد.

كلما القلب بيحّن لبلادي
بتخايل الأرزات بتنادي:
ليش صاير قلبكم صوّان؟
تمنيت حدّي إقشع ولادي
بحلم يقولو شعبنا فرحان
وصارت ليالي الكيف منعادي
وما يضلّ ببلادي شخص عطشان
والجايع بيحصل عا زّوادي
انتخبو رئيس وعدّلو الميزان
تا الجيش يقوى موقفو زيادي
وبالسلاسل ربطو الشيطان
وحطوّ أفاعي الشر عا حْيادي...
نوّار ودّعنا وشهر نيسان
حزيران حسنو للنظر بادي
ولمّا الصيف يطل علبنان
بيبعت ورودو الياس وسعادي.
***
ويا الياس يا سعاده سوا شدّو
معكن نقيب الشعر مين قدّو؟
معكن الأسَّس منبر بدادون
ودّف الفغالي حامل بيدّو
معكن الرجّع للمعاني عيون
وصوبو عيون العالم إنشدّو
معكن الفجّر بالقوافي عيون
وحدّ النجوم العالية حدّو
معكن الباني للقصيده حصون
عواميدها ممنوع ينهدّو
معكن العندو من الزجل مخزون
لو طاف ربعو... الكون بيهدّو
لولا بِغنّي شعر ببحمدون
الناس من عكاّر بيردّو
مفروض فينا نعدّ بو انطون
بيّ الفكر والشعر والكلمة
وبيّ الوفا والمكرمة نْعدّو.
***
وتحت حمل الشعر في كتار ناؤو
وزادو بالتواؤو وانحناؤو
ونحنا بتضحية وهمّة قويه
رجعنا نجلسو من إلتواؤو
رجعنا عن محبّه وطيب نيّه
نجدد للمعنّى ألفْباؤو
لأنّو بكلمة الشعر الطليّه
بدنا نزيد عا نعمة سناؤو
زجل لبنان نغمتنا الشجيّه
من الضيعة جذورو وإنتماؤو
وصّا أسعد الخوري وصيّه
وأبو روكز ما منخيّب رجاؤو
ونقيب الشعر معنا بهالعشيّه
السموأل عم بيشحد وفاؤو
بجهدو ردّ للشعرا الهويّه
وحدّو البحر نقطه بإحتواؤو
وسعاده سعادة نفوس الأبيّه
والدكتور منقدّر عَناؤو
وبهيّه صاحبة طلّة بهيّه
بدار القنصليّه سجّلتنا
وردّت للزجل روعة بهاؤو.

CONVERSATION

4 comments:

  1. طوني الهاشم11 يوليو 2016 في 4:33 ص

    يا لطيف الشعر قانونو
    بيقول دربك عا العلى كفّي
    بكفّه إذا الشعّار بيكونو
    ووحدك بكفه بترجح الكفّه

    ردحذف
  2. يا لطيف بعيلة مخايل
    قلوب الأسود بختصرك شايل
    عنتر زمانك انت بالميدان
    مش بس هلّق من قبل قايل

    ردحذف
  3. يا لطيف بشعرك الصافي
    متل القطر ع صدر الكنافه
    للكاس مازه بحسبو ع طول
    رب السما يعطيك العوافي

    ردحذف
  4. إسمي حسين وعيلتي ضاوي
    ومنّو الأسد بالمقدره واوي
    شعرك دوا يا مخايل بينعد
    للأبجديّه در بيساوي

    ردحذف