يا ست بهية/ روميو عويس

لسفيرة السلام الدكتوره المحاميه رئيسة جمعية انماء الشعر في استراليا والعالم العربي عقيلة قنصل لبنان العام الصديقه بهية ابو حمد بمناسبة تعيينها سفيرة للسلام اهدي قصيدتي مباركا باللقب الجديد متمنيا لها الصحة ودوام التقدم والنجاح.

يا ست بهيه، والبَها خَلاّب

بلقب السفيره أسمك تْحَلّا

نَجمِك سَطَع، وتْعَدَّدو الالقاب

لقاب الفَخْر.. عم تنزَل مْحَلاّ

لفَوق ما بيعمل النسر حساب

ان طَيْلَق جناحو بالسما وْعَلّا

والشَّمس؟مين لقال نورا غاب؟

شارقه عَ طول بتْضَلاّ..

بوقت اللي نص الارض عندو غياب

بنصّا التاني النور متْجَلّى

ومتل الشمس انتي، الدني دولاب

ونورك مشَعْشَع عَ الدني كلاّ

والشمس؟ مَصْدَر نور،ما بتهاب

ولا في حدا قدران يوصَلاّ

البيدق فيها .. حَرّها اللهاب

بيحرقو.. وعنقو بيتدلّى

ستّي قالتلي:ان نَبَّحِت لكلاب

رميلا عضم يابس.. بتتسَلّى

يا حاصده الالقاب.. قَصدُن خاب

لقاب المجد فيكي بتتعَلّى

لولا نشاطك.. ما انتعَش لكتاب

والشعر لولا همّتِك؟ ولّى

ولا تْكَرَّمو الشعّار والكتّاب

والزَّمَن عن روح الادَب صَلّى

فعالك دهَب شَكلك حلو جذّاب

والقابك الحلوين؟ ما شالله

صَوت التهاني.. بدَقِّة الالباب

يدوم عزِّك.. يحرسك الله

روميو عويس/ سيدني استراليا