شفافها/ روميو عويس


شفاف؟ متل الفستقه
شلعة قلوب مْحَـرّْقه
ورزمة رْواح مْعَلّْقه
مَرْحَم حبال المشنقه
دخلك انا شو خْطِيت؟
الحق عا عيوني ..
العا الدرب دلّوني
العا الدبق حَطّوني
البنار رميوني ..
بلا مْحاكمه وبقيت
مْعَذَّب بقلب المحرقه
يا لهفة المحروم
عا شفاف متل الجمر
مدمن وصرلي عمر
شفافك قبالي خَمْر
نبيد احلا كروم
خوابي نبيد معتّقه
ما يبخل الخمّار
عا ناس عطشاني
ولا يحرما قناني
بالخمر ملياني
هيك خمرك صار
بس،خَرْج الحندقه
وشَعر الحلو زَخّة مَطَر
شلال هادل عا الكتاف
يا دل قلبو ال شاف
ويا حسرة الما شاف
شو مْبيَّن عا الضفاف
جبين الشمس،خَد القمر
عطر الورد والزنبقه
وبلوزتك لمعَرَّقه؟
للصدر متل الشرنقه
ساجنه فرافير
يا دوبها تنقير
بدّا لبرّا تطير
نص العراوي مفَتّقه
عن هَيك ما بْوَطّي
ولا بوصف البستان
وهاك الصبي الجهلان
ورح اترك الرمان
واشيا اللي بتخَطّي
يتمَجَّد اللي خالقا
وخالق شفافك فستقه
**

CONVERSATION

0 comments:

إرسال تعليق